నందమూరి బాలకృష్ణ హీరోగా జాగర్లమూడి రాధాకృష్ణ (క్రిష్) దర్శకత్వం వహిస్తున్న చిత్రం ‘గౌతమీపుత్ర శాతకర్ణి’. ఫస్ట్‌ఫ్రేమ్ ఎంటర్టైన్‌మెంట్స్ పతాకంపై సాయిబాబు, రాజీవ్ రెడ్డి నిర్మిస్తున్న ఈ సినిమా పతాక సన్నివేశాల చిత్రీకరణ వచ్చే నెల 2 నుండి మొదలు కానున్నట్టు సమాచారం. 22 రోజుల పాటు జార్జియాలో జరుగనున్న ఈ షెడ్యూల్‌లో క్లైమాక్స్ వచ్చే యుద్ధ సన్నివేశాలను చిత్రీకరించనున్నారట. ఇదంతా చూస్తుంటే అన్నిటికంటే ముందు యుద్ధ సన్నివేశాలను పూర్తి చేసేందుకే దర్శకుడు కంకణం కట్టుకున్నట్టు తెలుస్తోంది. మొరాకోలో జరిగిన తొలి షెడ్యూల్‌లో 1000 మంది జూనియర్ ఆర్టిస్ట్‌లు సహా 200 గుర్రాలతో కొన్ని యుద్ధ సన్నివేశాలను చిత్రీకరించిన క్రిష్ హైదరాబాద్‌లో జరిగిన తర్వాతి షెడ్యూల్లోనూ రామ్ లక్ష్మణ్ నేతృత్వంలో మరి కొన్ని యుద్ధ సన్నివేశాలను తెరకెక్కించారు. ఇక తర్వాతి షెడ్యూల్‌ను వాటికే కేటాయించారు. ‘బాహుబలి’ తర్వాత యుద్ధ నేపథ్యంలో వస్తున్న సినిమా గనక ఆ స్థాయికి తక్కువ కాకుండా క్రిష్ జాగ్రత్త వహిస్తున్నారట. బాలయ్య వందో చిత్రంగా రానున్న ఈ సినిమాకి దేవీ శ్రీ ప్రసాద్ సంగీత దర్శకుడు.
Post a Comment